जयपूर, 24 मार्च : रविवारी इंडियन प्रीमियर लीग (IPL) 2024 च्या चौथ्या सामन्यात रॉयल्सने लखनौ सुपर जायंट्सचा 20 धावांनी पराभव केला.
जयपूरच्या सवाई मानसिंग स्टेडियमवर खेळल्या गेलेल्या सामन्यात प्रथम फलंदाजी करताना राजस्थान संघाने 20 षटकांत 4 बाद 193 धावा केल्या. प्रत्युत्तरात लखनौचा संघ 20 षटकांत 6 गडी गमावून 173 धावाच करू शकला.
194 धावांच्या मोठ्या लक्ष्याचा पाठलाग करण्यासाठी उतरलेल्या लखनौ सुपर जायंट्सची सुरुवात चांगली झाली नाही आणि 11 धावांच्या एकूण धावसंख्येवर संघाने तीन विकेट गमावल्या. क्विंटन डी कॉक 4 धावा करून पॅव्हेलियनमध्ये परतला, देवदत्त पडिक्कल 0 आणि आयुष बडोनीने फक्त 1 धावा काढली.
यानंतर कर्णधार केएल राहुलने दीपक हुडासोबत डावाची धुरा सांभाळली. या दोघांनी संघाची धावसंख्या ५० धावांच्या पुढे नेली. चौथी विकेट 60 धावांवर पडली. दीपक हुडा 26 धावा करून बाद झाला. दीपक बाद झाल्यानंतर निकोलस पूरन आला. राहुलच्या बरोबरीने त्याने डाव वेगाने पुढे नेला.
दरम्यान, कर्णधार राहुलने आयपीएल कारकिर्दीतील 34 वे अर्धशतक झळकावले. मात्र, राहुलला आपले अर्धशतकानंतर फार काही करता आले नाही आणि तो 44 चेंडूंत चार चौकार आणि दोन षटकारांच्या मदतीने 58 धावा करून बाद झाला.
संघाची सहावी विकेट 154 धावांवर पडली. मार्कस स्टॉइनिस केवळ 3 धावा करून पॅव्हेलियनमध्ये परतला. अखेरच्या षटकांमध्ये पुरनने संघाला विजय मिळवून देण्यासाठी सर्वतोपरी प्रयत्न केले पण ते कमी पडले. पुरन 41 चेंडूत 64 धावा करून नाबाद राहिला.
राजस्थान रॉयल्सकडून ट्रेंट बोल्टने 2, तर नांद्रे बर्जर, युझवेंद्र चहल, संदीप शर्मा आणि रविचंद्रन अश्विनने प्रत्येकी 1 बळी घेतला.
या सामन्यात नाणेफेक जिंकून प्रथम फलंदाजी करताना राजस्थान रॉयल्सने 20 षटकांत 4 गडी गमावून 193 धावा केल्या होत्या. संघाकडून कर्णधार संजू सॅमसनने सर्वाधिक धावा केल्या.
सॅमसनने 52 चेंडूत 6 षटकार आणि 3 चौकारांच्या मदतीने 82 धावांची खेळी केली. कर्णधाराशिवाय रियान परागने 29 चेंडूंत 3 षटकार आणि 1 चौकाराच्या मदतीने 43 धावा केल्या. याशिवाय यशस्वी जैस्वालने 24, ध्रुव जुरेलने 20, जोस बटलरने 11 धावांचे योगदान दिले.
लखनौकडून नवीन उल हकने 2 तर मोहसिन खान आणि रवी बिश्नोई यांनी प्रत्येकी एक विकेट घेतली.
