पणजी : नॅशनल स्कूल ऑफ ड्रामा, (एनएसडी) गोवा येथे २९ जानेवारी ते १ फेब्रुवारी दरम्यान भारत रंग महोत्सव हा भारतीय आंतरराष्ट्रीय नाट्य महोत्सव आयोजित करत आहे. पणजी येथील मास्टर दीनानाथ मंगेशकर कला मंदिर, कला अकादमी येथे संध्याकाळी ६ वाजता होणाऱ्या उद्घाटन समारंभाला गोव्याचे मुख्यमंत्री प्रमोद सावंत प्रमुख पाहुणे म्हणून उपस्थित राहणार आहेत.
कला आणि संस्कृती संचालनालय, गोवा यांच्या सहकार्याने गोव्यात आयोजित, या चार दिवसीय महोत्सवात कला अकादमी येथे चार नाटके सादर होणार आहेत. गिरीश कर्नाड लिखित ‘नागमंडल’ या नाटकाने या महोत्सवाचा प्रारंभ होईल.‘भारंगम’ या नावाने ओळखला जाणारा भारत रंग महोत्सव हा जगातील सर्वात मोठा नाट्य महोत्सव आहे. ‘एक रंग, श्रेष्ठ रंग’ (एक अभिव्यक्ती, सर्वोच्च निर्मिती ) या संकल्पनेअंतर्गत भारत रंग महोत्सव २०२५ आयोजित करण्यात आला आहे. प्रख्यात अभिनेते आणिएनएसडीचे माजी विद्यार्थी राजपाल यादव हे यावर्षीचे रंग दूत (फेस्टिव्हल ॲम्बेसेडर) आहेत. तसेच २८ जानेवारी ते १६ फेब्रुवारी २०२५ या २० दिवसांच्या कालावधीत भारत रंग महोत्सव २०२५ मध्ये भारताव्यतिरिक्त ९ वेगवेगळ्या देशांतील २०० हून अधिक अनोखे नाट्याविष्कार सादर केले जाणार असून भारतात ११ ठिकाणी आणि परदेशात काठमांडू आणि कोलंबो या दोन ठिकाणी ते सादर केले जातील. महोत्सवाचा केंद्रबिंदू असलेल्या दिल्लीसह भारतात गोवा, आगरतळा, अहमदाबाद, भटिंडा, बेंगळुरू, भोपाळ, गोरखपूर, जयपूर, खैरागड आणि रांची येथे हे नाट्याविष्कार सादर होणार आहेत. या महोत्सवात आंतरराष्ट्रीय रंगभूमीवर कार्यरत असलेले नाट्य समूह सहभागी होणार आहेत. त्यामध्ये रशिया, इटली, जर्मनी, नॉर्वे, झेक रिपब्लिक, नेपाळ, तैवान, स्पेन आणि श्रीलंका या देशातील नाट्य समूहांचा समावेश आहे.
दिल्लीतील ‘एनएसडी’ परिसरामध्ये आयोजित पत्रकार परिषदेत या महोत्सवाबद्दल बोलताना, एनएसडीचे संचालक चित्तरंजन त्रिपाठी म्हणाले, “भारत रंग महोत्सव हा व्यापक दृष्‍टीकोन असलेला जागतिक व्यासपीठावरचा सर्वोत्कृष्ट नाट्य महोत्सव बनला आहे. या महोत्सवामुळे जगभरातील रंगकर्मींना नाट्य कला सादरीकरणासाठी एक व्यासपीठ तर प्राप्त होतेच , त्याच बरोबर विविध पारंपरिक कला प्रकारांच्या एकत्रीकरणाची संधीही उपलब्ध होते. याशिवाय, महोत्सवामध्‍ये नाट्य कला आणि इतर सर्जनशील क्षेत्रातील मान्यवरांमध्ये ज्ञान तसेच कल्पनांची देवाणघेवाण सुलभ झाली आहे.
विशेष म्हणजे, भारत रंग महोत्सव, एनएसडीचा ६५ व्या वर्धापन दिन आणि ‘एनएसडी रेपर्टरी कंपनी’ चा ६० वा वर्धापन दिनाचा योगायोग साधत आहे. हे महत्वपूर्ण टप्पे लक्षात घेऊन, रेपर्टरी कंपनी रंग षष्ठी नाट्य महोत्सव मालिका साजरी करत आहे. या मालिकेमध्‍ये देशभरातील विविध व्यासपीठांवर त्यांची काही सर्वात लोकप्रिय नाटके सादर केली जात आहेत. कंपनीच्यावतीने भारत रंग महोत्सव २०२५ दरम्यान कोलंबो, काठमांडू, बेंगळुरू आणि गोवा अशा ठिकाणी त्यांची निर्मिती देखील सादर केली जाणार आहे.
