नवी दिल्ली : भारताचे परराष्ट्रमंत्री एस. जयशंकर उद्या, मंगळवारपासून अमेरिका दौऱ्यावर जाणार आहेत ते 24 ते 29 डिसेंबर दरम्यान अमेरिका दौऱ्यावर असतील. या दौऱ्यात दोन्ही राष्ट्रांमध्ये द्विपक्षीय, प्रादेशिक आणि जागतिक मुद्द्यांवर चर्चा होणार आहे. केंद्रीय मंत्री जयशंकर यांच्या अमेरिका दौऱ्याची परराष्ट्र मंत्रालयाने निवेदन जारी करुन माहिती दिली. यासंदर्भात परराष्ट्र मंत्रालयाने सांगितले की, परराष्ट्रमंत्री सुब्रमण्यम जयशंकर महत्त्वाच्या द्विपक्षीय, प्रादेशिक आणि जागतिक मुद्द्यांवर चर्चा करण्यासाठी अमेरिकेला भेट देतील.
या भेटीदरम्यान, अमेरिकेतील भारताच्या कौन्सुल जनरल्सच्या परिषदेचे अध्यक्षस्थान देखील ते भूषणवणार आहेत. यापूर्वी 19 डिसेंबर रोजी, भारतातील अमेरिकेचे राजदूत एरिक गार्सेट्टी यांनी दोन्ही देशांच्या भागीदारीच्या संभाव्यतेवर प्रकाश टाकला. दोन्ही देशांमधील व्यापार वाढवण्यावर भर दिला जाणार असल्याचे गार्सेट्टी यांनी सांगितले. या दरम्यान, परराष्ट्र मंत्र्यांचा अमेरिका दौरा हा महत्वाचा मानला जात आहे.
