मुख्यमंत्री एकनाथ शिंदे यांची घोषणा
मुंबई – अनंत नलावडे
राज्यातील मराठवाडा,विदर्भ,पुणे,आणि पनवेल येथे १ लाख १७ हजार २२० कोटी रुपये गुंतवणुकीच्या उच्च तंत्रज्ञानावर आधारित ४ विशाल प्रकल्पांना गुरुवारी मुख्यमंत्र्यांच्या अध्यक्षतेखाली पार पडलेल्या उद्योग विभागाच्या मंत्रिमंडळ उपसमितीच्या बैठकीत मान्यता देण्यात आली.या प्रकल्पांमुळे सुमारे २९ हजार रोजगार निर्मिती होणार असून आज मान्यता दिलेल्या प्रकल्पांमुळे राज्यात सेमीकंडक्टर आणि इलेक्ट्रीक वाहन निर्मितीमध्ये मोठया प्रमाणात गुंतवणूक,प्रत्यक्ष अप्रत्यक्ष रोजगार निर्मिती होणार असल्याचा दावा मुख्यमंत्री एकनाथ शिंदे यांनी यावेळी पत्रकारांशी बोलताना केला. यामुळे महाराष्ट्राची ओळख ही इलेक्ट्रिक वाहन निर्मिती क्षेत्रामध्ये अग्रेसर राज्य अशी होणार असल्याचेही मुख्यमंत्र्यांनी ठासून सांगितले.
दरम्यान, यापूर्वी जुलै महिन्यात झालेल्या उपसमितीच्या बैठकीत ८० हजार कोटींच्या गुंतवणूक प्रकल्पांना मान्यता देण्यात आली होती.त्यामुळे गेल्या दोन महिन्यात झालेल्या बैठकांमध्ये एकूण दोन लाख कोटींच्या गुंतवणूक प्रकल्पांना मान्यता मिळाली असून ज्यामुळे ३५ हजार रोजगार निर्मिती होणार असल्याचाही दावा मुख्यमंत्री शिंदे यांनी केला.
मंत्रालयातील मंत्रिमंडळ सभागृहात आज झालेल्या या बैठकीस उपमुख्यमंत्री देवेंद्र फडणवीस उपस्थित होते.तरं उद्योग मंत्री उदय सामंत दरदृष्यप्रणालीच्या माध्यमातून सहभागी झाले होते.यावेळी मुख्य सचिव सुजाता सौनिक, मुख्यमंत्र्यांचे अपर मुख्य सचिव डॉ.आय.एस.चहल, अपर मुख्य सचिव विकास खारगे,वित्त विभागाचे अपर मुख्य सचिव ओ.पी. गुप्ता, उद्योग विभागाचे प्रधान सचिव डॉ.हर्षदीप कांबळे आदी उपस्थित होते.
आज झालेल्या बैठकीत टॉवर सेमीकंडक्टर कंपनीचा उच्च तंत्रज्ञानावर आधारित सेमीकंडक्टर निर्मितीचा अतिविशाल प्रकल्प रायगड जिल्ह्यातील पनवेल येथे उभारण्यात येणार असून या प्रकल्पामध्ये पहिल्या टप्प्यात ५८ हजार ७६३ कोटी तर दुसऱ्या टप्यात रूपये २५ हजार १८४ कोटी अशी एकूण ८३ हजार ९४७ कोटी रुपयांची गुंतवणूक होणार आहे.तसेच या प्रकल्पामुळे १५ हजार रोजगारनिर्मिती होणार असल्याची माहितीही मुख्यमंत्री शिंदे यांनी दिली.
दरम्यान,३० जुलैला झालेल्या मंत्रिमंडळ उपसमितीच्या बैठकीत आरआरपी इलेक्ट्रॉनिक्स यांच्या सेमीकंडक्टर निर्मितीच्या अतिविशाल प्रकल्पास मान्यता देण्यात आली असून हा प्रकल्पही सेमीकंडक्टर निर्मितीचा राज्यातील पहिलाच प्रकल्प आहे.या प्रकल्पामध्ये लवकरच ओसॅट, चिप्स निर्मिती सुरू होणार आहे. आरआरपी इलेक्ट्रॉनिक्स व टॉवर सेमीकंडक्टर कंपनी यांच्या प्रकल्पांमुळे प्रगत सेमीकंडक्टरची निर्मिती होणार असून या क्षेत्रात महाराष्ट्र भारताच्या अग्रस्थानी राहणार असाही दावा करत देशातील वाढती मागणी पुर्ण करणे व सेमीकंडक्टरची इकोसिस्टीम स्थापित करण्यास देखील चालना मिळणार असल्याचा विश्वासही मुख्यमंत्री शिंदे यांनी व्यक्त केला.
याव्यतिरिक्त स्कोडा ऑटो फोक्सवॅगन इंडिया कंपनीचा प्रकल्प पुणे येथे एकात्मिक पध्दतीने स्थापना करण्यात येणार आहे.या प्रकल्पामध्ये एकूण १२ हजार कोटी एवढी गुंतवणूक होणार असून त्यामुळे एक हजार रोजगार निर्मिती होणार असून प्रकल्पातून अत्याधुनिक तंत्रज्ञानावर आधारित इलेक्ट्रीक व्हेईकलचे निर्मिती केली जाणार असल्याचेही त्यांनी यावेळी सांगितले.
टोयोटा किर्लोस्कर मोटर कंपनीचा प्रकल्प राज्याचे इलेक्ट्रीक वाहन प्रोत्साहन धोरणांतर्गत इलेक्ट्रीक वाहन निर्मितीचा अतिविशाल प्रकल्प छत्रपती संभाजीनगर येथे सुरू करण्यात येणार असून या प्रकल्पामध्ये एकूण २१ हजार २७३ कोटी एवढी गुंतवणूक होणार असून त्यामाध्यमातून १२ हजार रोजगार निर्मिती होणार आहे.यामुळे महाराष्ट्राची ओळख ही इलेक्ट्रिक वाहन निर्मिती क्षेत्रामध्ये अग्रेसर राज्य अशी होण्यास मदतच होणार असली तरी
या प्रकल्पामुळे तांत्रिक नवकल्पना, संशोधन आणि विकासाला चालना मिळून एक मजबूत स्थानिक पुरवठा साखळी विकसित होईल, असाही ठाम विश्वास मुख्यमंत्र्यांनी व्यक्त केला.
यापूर्वी जेएसडब्ल्यु ग्रीन मोबिलीटी यांचा छत्रपती संभाजीगनर येथे इलेक्ट्रीक वाहन निर्मितीच्या प्रकल्पास मान्यता देण्यात आली होती तर आता टोयोटा किर्लोस्कर मोटर यांचा इलेक्ट्रीक वाहन निर्मितीमध्ये मोठया प्रमाणात गुंतवणूक होणार असल्याने छत्रपती संभाजीनगर येथील हा दुसरा अतिविशाल प्रकल्प असून या क्षेत्राचा सर्वंकष विकास होण्यास चालना मिळणार आहे,असेही त्यांनी यावेळी स्पष्ट केले.
रेमंड लक्झरी कॉटन्स यांचा वस्त्रोद्योग धोरणांतर्गत स्पिनींग, यार्न डाइंग, विव्हींग ज्यूट, विव्हींग कॉटन, ज्यूट, मेस्टा, कॉटन ह्या उत्पादनांच्या निर्मितीचा विशाल प्रकल्प अमरावतीतल्या नांदगाव पेठ येथे अतिरिक्त औद्योगिक विकास महामंडळ येथे होणार आहे.याप्रकल्पातही १८८ कोटी एवढी गुंतवणूक आणि ५५० रोजगार निर्मिती होणार असल्याचेही मुख्यमंत्री शिंदे यांनी सांगितले.
